– Klarna bør ha strengare reglar for kven dei lèt bruke tenestene sine. Eg netthandlar ein god del, og synest det er blitt for lett for useriøse seljarar slik det er no, seier Helene Moss.
Vi må spole tilbake til November 2021. Helene har bestilt fleire ullkåper frå den svenske nettbutikken Dennis Maglic etter å ha sett reklame på sosiale medium.
Nettbutikken tilbyr Klarna som betalingsmetode, og Helene vel å bruke fakturaløysinga til Klarna, slik at ho kan prøve kleda på før ho betalar for dei.
– Etter eg fekk kleda i posten ville eg behalde den eine jakka, og den andre sende eg tilbake i posten like etterpå.
Jakka ho sendar i retur, med ein prislapp på 3000 kroner dukkar opp på det lokale postkontoret igjen ein månad etterpå.
– Eg tok kontakt med nettbutikken og forklarte situasjonen. Då avtala vi ei alternativ adresse å sende pakken til, men òg denne kom i retur, seier Harstadværingen.
Fryser betalinga, men vil ikkje hjelpe
Etter dette fekk Helene beskjed av nettbutikken av angrefristen har gått ut, og at ho ikkje har anledning til å sende produktet tilbake. Ho forsøkte å sende pakken tilbake fleire gongar utan hell.
På dette tidspunktet har Helene kontakta Klarna, som tilbaud seg å fryse betalinga til problemet var løyst.
– Etter å ha forsøkt å løyse problemet med nettbutikken på eiga hand fekk eg tips om å kontakte Forbruker Europa. Eg fekk raskt hjelp av ein saksbehandlar, og er veldig fornøgd med oppfølginga. Når eg tidvis blei lei undervegs i prosessen, så heldt ho saka gåande og støtta meg, seier ho.
Etter ei tid blei det tydeleg for Helene og saksbehandlar for Forbruker Europa at nettbutikken stod på sitt, og meinte at Helene måtte betale for jakka. Klarna, som kredittytar, tok òg nettbutikken si side, og ville ikkje slette pengekravet.
– Klarna ville eg skulle løyse problemet med nettbutikken. Eg meiner dei ikkje viste noko annan vilje til å hjelpe meg enn å tilvise til nettbutikken.
Tok saka til Finansklagenemda
Helene blei derfor anbefalt å ta saka si vidare til Finansklagenemda for å få Klarna til å ordne opp.
Etter at Finansklagenemda tok kontakt med Klarna, skal Klarna ha svart raskt at dei vurderte saka på nytt. Dei avgjorde å løyse saka saman med nettbutikken, og bad Helene sjå bort frå pengekravet.
– Det var verdt å vente på. Eg trur mange har tillit til Klarna som merkevare. Men det begynner no å bli litt misvisande, for ein kan bli lurt til å handle på useriøse nettstadar, seier Helene.
Sjølv om saka løyste seg, meiner Forbruker Europas direktør Linn Hogner Jahr at det har teke unødvendig lang tid.
– Det er tungvint, og ressurskrevjande for alle partar. Viss Klarna hadde teke ansvar frå start, som dei skal som kredittytar, ville kjøpet vore heva for lenge sidan, seier ho.